Skrander Matie sterf
2009-09-03 07:58
Jan Gerber
Stellenbosch - ’n Twintigjarige man is Dinsdag oorlede nadat hy ondanks leukemie ’n ideaal verwesenlik het om met sy studies voort te gaan en in sy pa se koshuisvoetspore te loop.
Bruwer de Kock, wat vanjaar begin het met die kursus BSc (wiskundige wetenskappe) aan die Universiteit Stellenbosch (US) het in die Constantiaberg Medi-Clinic in Kaapstad die stryd teen kanker verloor.
Volgens Llewellyn MacMaster, US-studentedekaan, was De Kock ’n briljante student en het hy drie van die vier modules waarin hy in Junie eksamen geskryf het, met onderskeidings geslaag.
“Saam met die hartseer oor De Kock se afsterwe, is die universiteitsbestuur, personeel en studente diep geraak deur sy deursettingsvermoë.Hy het ondanks sy siekte gekies om sy matriek te voltooi en sy studies aan te pak. Dit was ook sy wens om in die koshuis te wees waar sy pa ook ’n inwoner was.”
De Kock, oorspronklik van George, was ’n inwoner van Dagbreek. Dié manskoshuis se inwonende hoof, dr. De Wet Strauss, het saam met De Kock se pa, André, in die koshuis gebly.
Volgens Strauss was De Kock baie slim. Sy ouers het aan die begin van die jaar gevra dat sy koshuismaats nie oor sy siekte ingelig word nie.
Strauss het gesê De Kock se toestand het ná die Junie-vakansie versleg en dat hy die koshuis net vlugtig besoek het om sy besittings te kom haal. ’n Beenmurgoorplanting is ook probeer.
Hy is die elfde student aan die US wat vanjaar gesterf het.
Dinayah Kortje (19), ’n B Ed-student en inwoner van die Harmonie-vrouekoshuis en ook oorspronklik van George, het in Julie weens tuberkulose in ’n hospitaal in George gesterf.
Die US het sy medelye met De Kock se ouers betuig en moedig studentemaats en vriende aan om van die Sentrum vir Studentevoorligting en – ontwikkeling se beradingsdienste gebruik te maak, sou hulle dit benodig.
De Kock het in 2008 met ’n onderskeiding aan die Hoërskool Outeniqua in George gematrikuleer, luidens dié skool se webblad.
Die begrafnis is Saterdag in George.
- Die Burger