Skote klap by vakansie-oord
2010-06-17 08:57
Daniëlla du Plooy, Beeld
Johannesburg - ’n Groep Johannesburgers wat vakansie hou op ’n kampeerterrein aan die noordkus van KwaZulu-Natal het Dinsdagaand wakker geword van rowerkoeëls wat hul woonwaens deurboor het.
’n Veiligheidswag is in die been geskiet en die rowers het met selfone, kameras en duisende rande weggekom.
Volgens Willie Maartens (40) van Roodepoort kampeer hy en familielede sedert Saterdag in drie woonwaens en verskeie tente op die Gwala-gwala-kampeerterrein in die St. Lucia-moeraslandreservaat.
Die drie gesinne het almal Dinsdagoggend lê en slaap toe hulle omstreeks 00:15 wakker word van skote.
“Dit het twee van ons woonwaens deurboor. Die wagte het op die rowers afgekom wat besig was om ons motors te plunder en ’n skietery het ontstaan.”
Daar was vermoedelik drie rowers.
Volgens Maartens is dit “net genade” dat niemand in sy familie beseer of dood is nie.
“As van die mense aan die ander kant van hul woonwa lê en slaap het, was hulle dood. Die woonwaens is deurboor.
“Dis aaklig om só iets oor te kom terwyl jy eintlik net wil ontspan en wegkom van alles.”
Hulle het ook patroondoppies in die tent gevind waar van die kinders lê en geslaap het.
“Die kinders is ontsteld, maar ek dink hul ma’s is selfs meer getraumatiseer.”
Die rowers het vermoedelik by van die woonwaens ingebreek, motorsleutels gesteel en toe begin om die motors leeg te dra.
Dit was tóé dat die kamp se twee veiligheidswagte op hulle afgekom het.
Thulani Bruce Mbonambi, kampbestuurder, het die voorval bevestig.
Volgens hom is die veiligheidswag se enkel gebreek weens die koeël se impak, maar hy is buite gevaar in ’n plaaslike hospitaal.
Mbonambi het gesê hy werk al sedert 1999 by die oord.
“So iets het nog nooit hier gebeur nie. Inbrake en diefstal wel, maar dit is die eerste keer dat geskiet is. Ek is ontsteld en geskok.”
Maartens het gesê die polisie was gou ná die voorval op die toneel.
Die groep het besluit om nie hul vakansie kort te knip nie. “Hierdie is immers Suid-Afrika!” het Maartens gister spottend aan Beeld gesê.
“Waarheen sal ons dan nou gaan? Dis nie asof dit tuis veiliger is nie!”
’n Polisiewoordvoerder kon nie gisteraand vir kommentaar bereik word nie.
- Beeld