'Skorsing pla my nie' – Malema
2011-11-25 07:00
Bloemfontein – 'n Uitdagende Julius Malema, geskorste president van die ANC-jeugliga, sê hy gee nie ’n duit om oor sy skorsing uit die ANC nie.
Malema het in Rocklands, Bloemfontein, gesê as hy nie meer daar is as president nie, sal hy steeds die posisie van die jeugliga verdedig. “Ons weet nie wat die toekoms vir ons inhou nie, maar ons gee nie om nie.”
Hy het tot middernag gehad om sy appèl teen sy skorsing in te dien.
Malema het gesê die grond moet teruggeneem word vir openbare belang. Die ANC se stryd was nog altyd oor grond.
Die New Rocklands-saal was lank voor sy aankoms gister gevul met jeugdiges wat sporadies vryheidsliedere gesing het.
Krete van “Weg met Magashule!” kon gehoor word teen premier Ace Magashule van die Vrystaat, die voorsitter van die ANC in die provinsie.
“Viva president Kgalema Motlanthe, viva president Fikile Mbalula!” is ook gehoor.
In reaksie op die woede teen Magashule het Malema gevra: ‘’Hoekom is julle bang vir een man?”
Malema het die Teboho Sikisi-gedenklesing gelewer. Sikisi, ’n voormalige Vrystaatse leier van die jeugliga, is in 2009 in ’n motorongeluk dood.
Die jeugliga in die Vrystaat wil Woensdag ’n optog vir ekonomiese vryheid na die kantoor van Magashule hou, in navolging van Malema se optog onlangs in Gauteng.
Volg Nuus24 op Twitter
- Volksblad