Skoonmaker gee R113 000 terug
2010-07-14 09:31
Johannesburg - ’n Baie verligte Nederlandse toeris wat $15 000 (sowat R113 000) in ’n hotelkamer in Limpopo vergeet het, het dit alles danksy ’n eerlike skoonmaker teruggekry.
Volgens Simon Sutherland, bestuurder van die Park Protea-hotel in Mokopane (Potgietersrus), het die toeris, wat nie sy naam genoem wil hê nie, die naweek saam met sy gesin daar oorgebly.
Hy was in die land vir die Wêreldbeker-sokkertoernooi en het die kontant, gelykstaande aan sowat R113 000, onder ’n Bybel in hul hotelkamer vergeet.
Toe Geneva Ramashita, die skoonmaker, die hoop Amerikaanse dollarnote ontdek, het sy dit aan haar toesighouer, Bridgete Msane, gaan oorhandig.
Msane het dit dadelik vir Sutherland gegee, wat “uit die veld geslaan” was oor dié reuse-bedrag kontant.
“Ons het gesien dit lyk eg en dit in die kluis gaan bêre. Enkele ure later het die toeris by die hotel opgedaag en paniekerig gesê hy het iets in sy kamer vergeet.
“Hy was baie bly om te hoor Geneva het sy geld gevind en het haar $300 (sowat R2 270) as beloning gegee.”
Sutherland het gesê die man was amper in Johannesburg toe hy agterkom hy het nie die geld by hom nie. Hy het omgedraai en teruggery.
Volgens Sutherland het die toeris gesê hy het sy besoek aan Suid-Afrika baie geniet en dat hy beslis weer sou terugkeer.
“Die geld wat hy teruggevind het, het die kroon gespan op ’n vakansie wat hy as ongelooflik beskryf het.”
- Die Burger