Skooltas-diewe bly agter tralies
2011-05-30 23:04
Johannesburg - Twee mans wat verbind word met meer as 13 skooltas-diefstalle en ander eiendom wat aan leerlinge van skole in en om Johannesburg behoort, se saak is Maandag in die Johannesburgse landdroshof uitgestel.
Angelo Allan (21) en Quinton Lee (27) – wat ook met kredietkaartbedrog met motordiefstal verbind word – sal op 3 Junie weer in die hof verskyn vir ‘n formele borgtogaansoek, het lt. Lungelo Dlamini, polisiewoordvoerder, gesê.
Hulle is Vrydag in Glenada, suid van Johannesburg, in hegtenis geneem nadat die polisie ‘n wenk ontvang het.
Dlamini het gesê die diefstalprobleem by verskeie skole in Johannesburg duur nou al ‘n tydjie lank. Die mans is agtervolg en in Glenanda vasgetrek, voordat hulle na hul huise in Kenilworth en Brackendowns vergesel is.
Verskeie gesteelde items van meer as R10 000 is daar gevind. Dit sluit skooluniforms, sportsakke, sporttoerusting, voertuigsleutels, selfone en ander items in, het Dlamini gesê.
“Hulle is by verskeie skole opgemerk en word reeds met sewe sake in Hillbrow en ses sake in Booysens verbind.”
Een van die verdagtes is op die oomblik uit op borgtog van R5 000 op ‘n onverwante klag van motordiefstal.
- Volg Nuus24 op Twitter
- SAPA