Skoolseuns geskors wat by meisies kuier
2011-08-18 19:05
Pietermaritzburg – Seuns by ‘n Hoërskool in Pietermaritzburg wat in die meisieskoshuis betrap is, is uit hul koshuis geskors, het die onderwysdepartement in KwaZulu-Natal Donderdag gesê.
“Die leerders is slegs uit die koshuis geskors. Hulle mag voortgaan om soos gewoonweg klas te loop,” het Mbali Thusi, woordvoerder, gesê.
Die leerders is van die Sukuma Comprehensive Hoërskool in die Imbali-township buite Pietermaritzburg.
Twee-en-twintig seuns is op 6 Augustus in die meisieskoshuis betrap, wat ‘n oortreding van koshuisreëls is. Hulle het na bewering aan seksuele aktiwiteite met die meisies deelgeneem.
Die leerlinge en hul ouers is Woensdag ingeroep om die situasie te bespreek. Die besluit om hulle te skors, is tydens hierdie vergadering gemaak.
Thusi het gesê ondanks die verdenking is daar geen bewyse dat hulle seks gehad het nie.
“Verdere ondersoeke duur voort, wat die inwin van inligting by die koshuishoofde insluit.”
Sommige ouers het die besluit om die leerlinge te skors sonder om teen die koshuishoofde op te tree, bevraagteken, het sy gesê.
- Volg Nuus24 op Twitter
- SAPA