Skoolhoof se dood verdag
2009-10-21 20:40
Durban - Die polisie het ‘n ondersoek van stapel gestuur nadat ‘n skoolhoof in KwaZulu-Natal onder verdagte omstandighede gesterf het.
“Vusi Humphrey Mbatha (53) is Dinsdagmiddag in sy huis in Umsinga ontdek nadat mans geklee in polisie-uniforms ‘n besoek aan hom afgelê het. Daar was geen duidelike merke aan sy liggaam nie en ook geen tekens van ‘n worsteling nie,” het snr. Supt. Jay Naicker, polisiewoordvoerder, Woensdag gesê.
Mbatha was die hoof van Laerskool Elandsberg.
Volgens Naicker het lede van die Suid-Afrikaanse polisiediens (SAPD), die Onafhanklike Klagtedirektoraat (OKD) en die forensiese patoloë reeds die toneel gefynkam vir enige bewyse wat die raaisel agter Mbatha se dood sal kan oplos.
Volgens ooggetuies het onbekende mans geklee in uniform ‘n besoek aan Mbatha se huis afgelê. Kort daarna het sy gesin hom dood in sy bed aangetref.
‘n Patoloog is spesiaal ingevlieg om die toneel te deursoek. Die polisie het hulle volle samewerking aan die OKD gebied.
–Sapa