Skoolhoof reël glo sluipmoord
2009-10-27 08:11
Alet Rademeyer
Johannesburg - Die kringbestuurder van die Mpumalanga-onderwysdepartement wat verlede week in sy motor doodgeskiet is, was blykbaar die slagoffer van ’n sluipmoord wat glo deur ’n skoolhoof gereël is.
Isaac Mohale Matsoabane (59) is Woensdag tussen 06:00 en 07:30 voor die onderwysdepartement se kringkantoor in Witbank geskiet terwyl hy koerant gelees het.
Komm. Rex Machabi, waarnemende polisiekommissaris in Mpumalanga, het gister in ’n verklaring gesê twee mans is in hegtenis geneem.
Isaac Magugu Mlambo (42), waarnemende hoof van die Kopanang High School in Witbank, en Themba Bongani Xulu (35) het gister in die landdroshof in Witbank op aanklag van moord verskyn. Hulle is nie gevra om te pleit nie en die saak is tot 2 November uitgestel.
Hulle bly in aanhouding.
Luidens die verklaring het Mlambo na bewering die moord beplan. Hy het Xulu glo R25 000 beloof indien hy van Matsoabane ontslae sou raak.
Die polisie het leidrade opgevolg en Mlambo Donderdag in Middelburg aangekeer.
Hy het die polisie na Vosloorus in Gauteng gelei waar Xulu gearresteer en ’n 9 mm-pistool by hom gevind is. Daar is vasgestel dat Mlambo om die pos as hoof by Kopanang aansoek gedoen het.
Hy het Matsoabane blykbaar daarvoor verantwoordelik gehou dat hy nie die pos gekry het nie.
Die verdagtes het bekentenisse afgelê.
- Beeld