Skoolhoof gryp kind glo aan die keel
2011-06-07 09:14
Polokwane – Die ouma van ’n tienjarige seun het ’n klag van aanranding by die polisie ingedien nadat sy skoolhoof hom glo aan die keel gegryp en gedreig het om hom dood te maak.
Jenny Taljaard, wat na haar kleinseun Guvani omsien, het gesê sy het hom en die ander kinders in haar sorg uit die Laerskool Leeupoort in Limpopo gehaal omdat sy die gedrag van die hoof, wat net as mnr. Lebelo bekend staan, onaanvaarbaar vind.
“Ek is baie ontsteld. Ek dink nie ’n mens kan jou kind in ’n skool los as hy met die dood gedreig word nie.”
Volgens Taljaard was die voorval op Woensdag 25 Mei.
Sy is ontbied en het glo dadelik die merke aan Guvani se nek gesien.
Sy wou die saak onmiddellik aanmeld en ’n klag indien, maar die polisie was besig en sy kon dit eers die Sondag daarna doen.
Taljaard het gesê dit is nie die eerste keer wat sy probleme met die skool het nie. Volgens haar is daar gereeld ’n bakleiery en probleme met boelies.
In ’n vorige voorval is Guvani beseer en sy oortrom het gebars.
Volgens Taljaard het sy hoeveel vergaderings met die skool ná die voorval gehad sonder dat iets gebeur het.
Sy het ook beweer die brief wat sy na Lebelo in dié verband gestuur het, is deur hom opgeskeur.
Lebelo wou glad nie kommentaar lewer of sy voornaam bekend maak nie.
Volg Nuus24 op Twitter
- Beeld