Skool verbied kinders om drukkies te gee
2011-10-01 10:24
Kaapstad – ’n Kaapse laerskool het sover vasgestel kon word die eerste skool in die land geword wat leerlinge verbied om mekaar in skooltyd op die skoolterrein drukkies van watter aard ook al te gee.
Elaine Kesten, hoof van die Laerskool Wolraad Woltemade in Bothasig, het ook speletjies met balle tydens pouses verbied.
In albei gevalle geld die verbod net vir leerlinge in gr. 5, gr. 6 en gr. 7.
Kesten se opdragte het ’n kwaai openbare debat tussen ouers en die skool veroorsaak, wat nou meegebring het dat die hele aangeleentheid na die skool se beheerliggaam verwys is.
’n Woordvoerder van die skool het Vrydag bevestig dat die drukkiesverbod en die balspelverbod steeds van krag is. Kesten was nie vir kommentaar beskikbaar nie omdat sy eers ná die beheerliggaam se besluit daaroor sal praat.
Die gemeenskapskoerant Tabletalk, wat in die skool se gebied versprei word, het berig dat Kesten gesê het sy moes optree oor kinders wat mekaar “druk” – of dit nou ’n meisie met ’n meisie of ’n meisie met ’n seun is – omdat daar te veel gevalle voorkom waar sulke “drukkies” ontaard in situasies waar die kinders “onbehoorlik teen mekaar vryf en druk” of “onbehoorlik aan mekaar vat”.
Sy beskou dit as haar plig om alle kinders teen sulke gedrag te beskerm en daarom is selfs onskuldige drukkies ook nou verbode.
Wat balspeletjies betref, is dit verbied omdat die kinders mekaar kan seermaak of omdat hulle aan die baklei kan raak.
– Volg Nuus24 op Twitter
- Die Burger