Skool sluit deure weens waternood
2010-10-20 10:05
Volksblad
Steynsrus – Die Gekombineerde Skool Steynsrus met sy meer as 500 leerlinge moes gister noodgedwonge sy deure sluit weens ’n waternood wat dié dorp reeds twee weke lank verlam.
Die skool se twee koshuise, met 120 leerlinge elk, kon nie ’n minuut langer sonder water funk- sioneer nie.
Baie koshuiskinders het reeds siek geword. Toilette is verstop en wasgoed kan nie gewas word nie.
Danie van Schalkwyk, skoolhoof, het Dinsdag bevestig die skool is tot 31 Oktober gesluit.
Die laaste naweek van Oktober is die kinders se uitnaweek.
“Omdat hulle dan terugkeer, en ons hoop Steynsrus het teen daardie tyd weer water, het ons besluit om die skool tot 31 Oktober te sluit,” sê Van Schalkwyk.
Hy sê die Vrystaatse onderwysdepartement het toestemming gegee om tot dié drastiese stap oor te gaan.
“Die skool is egter nie vir die gr.12’s gesluit nie. Hulle begin oor ’n paar dae met eksamen. Die onderwysers sal ook elke dag op hul pos by die skool wees.”
Van Schalkwyk sê in ouerbriewe is dit duidelik gestel die verlore skoolwerk sál ingehaal word.
“Ons gaan nie dat opvoeding agterweë bly nie,” verseker hy.
Boere en ander hulpvaardiges het tot dusver water aangery na die koshuise en die Moqhaka-munisipaliteit verskaf wel ’n bietjie water in tenks, maar dit was nie genoeg nie.
“Die water wat die munisipaliteit verlede naweek verskaf het, het soos rivierwater gelyk. Jy kan nie eens jou voete daarin was nie.”
Van Schalkwyk sê die waterkrisis op Steynsrus is “uit en uit weens swak beplanning”.
Dr. Albé Viljoen, raadslid en woordvoerder van die DA-koukus op Kroonstad, het gister gesê Steynsrus se damwal het die vorige reënseisoen gebreek en geen water kon uit die Valsrivier in die dam geberg word nie.
“Hoewel die damwal in April herstel is, het die munisipaliteit sy plig versuim om water na die dam te pomp,” sê Viljoen.
“Die munisipaliteit ry blykbaar ongeveer 20000 liter water per dag in tenks aan, maar nie al die inwoners is hiervan bewus nie.
“Diegene wat wel water in die tenks kry, kla die watertenks is vuil en die water nie geskik vir gebruik nie.”
Viljoen sê boorgate op Steynsrus wat veronderstel is om in krisistye water aan die publiek te verskaf, is buite werking omdat dit ook skynbaar nie in stand gehou word nie.
Mnr. Mcedisi Mqwathi, munisipale bestuurder, sê dié dorp sit met ’n reuse-wasterprobleem omdat die Valsrivier, waaruit water glo in die opgaardam buite Steynsrus gepomp word, se watervlak baie laag is.
Hy sê dié dam word voortdurend droër weens die hoë temperature.
Nadat die DA nou ingryping bepleit het, is alle oë gerig op mnr. M.J. Zwane, die LUR vir samewerkende regering, tradisionele leierskap en huisvestiging, oor die krisis op Steynsrus.
- Volksblad