Skool sê ma nie van ‘verkragting’
2010-11-14 07:23
Rapport
’n Enkelma wie se 14-jarige dogter glo deur ’n 19-jarige matriekleerling verkrag is, is woedend dat die Hoër Landbouskool in Jacobsdal haar nooit van die voorval in kennis gestel het nie.
Sy is eers die dag ná die skool daarvan te hore gekom het deur die polisie ingelig.
Die verdagte is ’n lid van die skool se eerste rugbyspan en skryf tans sy matriekeksamen.
“Die skool het eers sy ouers en die polisie in kennis gestel en toe die polisie gevra om my te kontak,” sê die ma Saterdag aan Rapport.
“My kind moes ’n dag lank met die geheim rondloop – sonder enige hulp of ondersteuning. Sy het Maandag die hele dag gehuil en aan niks deelgeneem nie. Maar geen onderwyser het opgelet dat daar fout is nie.”
Haar dogter het haar maats van die beweerde verkragting vertel en húlle het die personeellid aan diens van die koshuis daaroor ingelig. “Maar die skoolhoof is eers die volgende dag ingelig.
“My kind is toe deur die skoolhoof en die polisie ondervra en het mediese toetse ondergaan voordat daar besluit is om my in kennis te stel,” sê die ma.
Die ondersoekbeampte het haar glo “kil” gebel en gesê die polisie het genoeg inligting om te glo haar dogter is verkrag.
“Tot vandag toe wag ek nog vir ’n oproep van die skool,” sê sy.
“Ek het die hoof verskeie kere probeer bel, maar hy het nie my oproepe beantwoord nie. Tog was hy in dringende vergaderings met die ouers van die seun.”
’n Amptelike verslag aan die skool se beheerliggaam lui dat die slagoffer se twee kamermaats die voorval Dinsdagaand by die “toesighoudende opvoeder” in die koshuis aangemeld het.
Henco Gericke, die skoolhoof, het eers Woensdagmiddag besluit dat die ma in kennis gestel word, lui die verslag.
Gericke het nie gister Rapport se oproepe beantwoord nie.
Die verdagte het Vrydag in die landdroshof verskyn en is op borgtog van R2 000 vrygelaat.
- Rapport