Skool moet sluit ná kind verkrag
2009-12-09 12:56
Johannesburg - Die Gautengse onderwysdepartement gaan die skool waar ‘n sewejarige meisie na bewering in die toilette tydens skoolure verkrag is, toemaak, het The Star berig.
Direkteure van die DD Dliwayo laerskool is beveel om die skool en al sy takke te sluit, aangesien dié franchise onwettig is.
Die skool het drie takke: Protea Glen, Orlando-Oos in Soweto en Vosloorus in Ekurhuleni.
Die meisie is verlede Maandag na bewering by die skool in Protea Glen verkrag.
Boy Ngobeni, hoof van die Gautengse onderwysderpartement, het gesê die meisie en haar ma ontvang berading, het The Star berig.
Die skool het in 2002 aansoek gedoen vir registrasie by die onderwysdepartement maar die aansoek is nie goedgekeur nie.
“In Januarie 2007 het die departement die skool in kennis gestel dat sy aansoek nie geslaag het nie.
Die skool is gevra om onmiddelik alle bedrywighede te staak en die ouers in kennis te stel, maar het aangehou om onwettig voort te gaan,” het Ngobeni gesê.
Hy het gesê regstappe is ingestel om dié skole te sluit ná die beweerde verkragting plaasgevind het.
Leerders sal in nabygeleë skole geplaas word.
- Sapa