Skool in rou ná leerling se dood
2011-10-17 08:11
Jana Breytenbach en Jana van der Merwe
Kaapstad – ’n Wes-Kaapse skoolgemeenskap is geskok nadat een van sy topleerlinge ten tyde van ’n sporttoer in die Vrystaat verdrink het.
Die lyk van Precieux Waya Bazolo (15) is Saterdagoggend gekry nadat hy Donderdag in die Oranjerivier op ’n plaas naby die Gariepdam verdrink het.
Precieux het Woensdag saam met ’n atletiekgroep van die Hoërskool Milnerton na Bloemfontein gereis om aan die gewilde Clover-uitnodigingsatletiekbyeenkoms van Grey-kollege en die Hoër Meisieskool Oranje deel te neem.
Dit was met ’n blaaskans vir die groep van 21 leerlinge en drie onderwysers op die plaas Allemansdrift naby die dorp Gariepdam toe die treurspel hom afgespeel het. Die groep sou daar oorslaap en die volgende oggend weer die pad na Bloemfontein aanpak.
Van Precieux se spanmaats het met ’n kano in die Oranjerivier gevaar. Hy het glo agter die kano aangeswem. Volgens die polisie het hy nie ’n reddingsbaadjie aangehad nie. Toe sy maats aan wal kom, was hy nie meer agter hulle nie. Duikers het sedert Donderdag na hom gesoek.
Jean Bidier Waya Bazolo (49), Precieux se Kongolese pa, van Phoenix by Milnerton, het Sondag sterk voorgekom, maar het gesê hy is diep geskok oor die dood van sy oudste seun. “Ek moet sterk wees vir Emma, my vrou. Sy is erg getraumatiseerd.”
Waya Bazolo het gesê ’n groep vriende van hul kerk het hul jongste seun, Victor Waya Bazolo (8), kom haal om sy gedagtes vir ’n wyle af te lei. “Hy is baie hartseeroor sy boetie se dood.”
Paul Besener, skoolhoof van die Hoërskool Milnerton, was Sondag nog erg geskok oor die voorval en het gesê dit was juis ’n voorsorgmaatreël om op die plaas oor te slaap. “Dit voel asof ek my eie kind verloor het. Dit is verskriklik.”
Die groep het hom aan die kompetisie onttrek.
Lt.kol. Thandi Mbambo, provinsiale polisiewoordvoerder in die Vrystaat, sê die lyk is Saterdag omstreeks 10:00 uit die Oranjerivier geduik .
Mbambo sê ’n geregtelike doodsondersoek word gedoen.
Daar sal na verwagting Saterdag ’n begrafnis wees.
Johan Grobbelaar, buitemuurse koördineerder van Grey-kollege, sê die dood van dié jong seun is vir hulle hartverskeurend.
Volg Nuus24 op Twitter
- Volksblad