Skool beskerm glo boelies

2013-02-05 12:04

Johannesburg – Nuwe bewerings dat ‘n kind by Parktown Boys High geboelie is, het Maandag aan die lig gekom, maar die skool het enige kennis van intimidasie op sy perseel ontken.

‘n Dertienjarige moes glo dringende mediese hulp ontvang toe hy flou geword het by die skool nadat hy glo gedwing is om in die hitte te hardloop.

Die seun se ouers het aan Eyewitness News gesê hulle het hom uit die skool gehaal nadat hy glo weens sy gewig deur ouer leerders geteiken is.

David Everatt, voorsitter van die skool se beheerliggaam, het egter gesê die skool weet niks van die beweerde voorval nie.

“Sy ouers het nooit ‘n klagte gelê of die kwessie bespreek nie.”

Die kind se ma sê egter dit is nie die geval nie.

Sy beweer haar man het twee dae ná die voorval die hoof gebel, wat glo die boelies “beskerm” het en hul aksies wou regverdig.

Die seun se ouer broer, wat ook ‘n leerder by die skool is, sê onderwysers hou hulle blind vir dié soort voorvalle.

Foto's het vroeër op sosiale netwerke die ronde gedoen wat na bewering wys hoe leerders by die skool met kleefplastiek aan 'n paal vasgemaak word.

– Lees meer hier.

– Volg Nuus24 op Twitter