Skoliere na lykhuis as straf
2011-08-06 09:00
Johannesburg - ’n 28-jarige vrywilliger wat by die Sebokeng-polisiekantoor gewerk het, is van kindermishandeling beskuldig nadat sy ’n klomp matriekleerlinge vir straf na ’n lykhuis geneem het.
’n Betroubare bron het aan Beeld vertel sowat 50 matriekleerlinge van die Crystal Springs Combined School in Polokong in die Vaaldriehoek het op 3 Junie in ’n bus gery om ’n loopbaandag by die Universiteit van Pretoria (UP) by te woon.
“Die skoolhoof het baie sterk drank in van die leerlinge se tasse gevind. Hulle het geweier om bekend te maak wie dit aan hulle verkoop het en hy het hulle toe na die Sebokeng-polisiekantoor geneem.”
Volgens die bron is werkers van die eenheid vir slagofferondersteuning gevra om oor te neem aangesien die meeste van die kinders 18 jaar of ouer is.
“Een vrou (28) wat elke dag met minderjarige misdadigers werk en gatvol is, het besluit om sowat nege van die leerlinge (vyf seuns en vier meisies) na die Sebokeng-lykhuis te neem om hulle ’n les te leer.”
Sommige van die kinders het glo by die veiligheidshek geweier om verder te gaan en aan die diefwering vasgeklou, maar die vrou het hulle gedwing om in te gaan.
“Sy het daarbinne aan hulle talle lyke gewys en die kinders moes selfs ’n lykskouing aanskou.
“Die lyke van ’n baba wat doodgebrand het, ’n man wat met ’n mes doodgesteek is, ’n persoon wat deur ’n hond doodgebyt is en iemand wat in ’n motorongeluk betrokke was, is aan hulle gewys.”
Daarna moes die kinders onder meer die lykhuis se vensters was en vloere vee.
Woedende ouers het ’n aanklag van kindermishandeling teen die vrou, ’n kollega van haar en ’n man wat by die lykhuis werk, aanhangig gemaak.
“Een van die meisies weier glo om te eet en sukkel om snags te slaap, want elke keer wanneer sy haar oë toemaak, sien sy liggaamsdele,” het die bron gesê.
Die aanklaers het egter geweier om hulle te vervolg omdat wat die vrou gedoen het nie regtig as kindermishandeling kwalifiseer nie.
Kapt. Bheki Thwala, Sebo-keng-polisiewoordvoerder, het die voorval bevestig en gesê die vrou werk nie meer by die kantoor nie.
– Volg Nuus24 op Twitter
- Beeld