Skole kry óf nie hul boeke, óf dis nie in regte taal
2011-02-04 09:05
Beeld
Johannesburg - Die beloofde werkboeke vir gr. 1 tot gr. 6 in geletterdheid en gesyferdheid wat 19 000 laerskole begin vanjaar sou kry, het tientalle skole steeds nie bereik nie.
Waar die werkboeke, wat teen ’n koste van bykans R300 miljoen ontwikkel, gedruk en versprei moes word, skole wel bereik het, is dit in die verkeerde taal of te min.
In ’n peiling wat Beeld die afgelope twee dae by etlike skole in Gauteng, Mpumalanga, Limpopo en Noordwes gedoen het, het dit geblyk baie skole het nog geen boeke gekry nie.
Boduma Primary naby Polo-kwane het net werkboeke vir gr. 0 gekry, terwyl ’n skool soos Skhosana Primary naby Louis Trichardt niks gekry het nie.
In Noordwes het die B.F. Morake Primary School naby Rustenburg net gesyferdheidboeke vir gr. 0 en gr. 5 gekry, terwyl dit ook te min is. Die ander grade het niks gekry nie.
Die Bakang Selebo Primary School en D.P. Kgotleng Primary in Mafikeng het geen boeke gekry nie, en Keotshepile Primary naby Potchefstroom net gesyferdheidboeke vir gr. 5.
In Mpumalanga het Phakani Primary naby Nelspruit net boeke vir gr. 0 tot gr. 3 gekry. Ndlemane Primary naby Malalane het net werkboeke vir gr. 3 in gesyferdheid gekry. Marambane Primary naby Lydenburg het of net geletterdheid- of net gesyferdheidwerkboeke gekry, maar ook te min vir sommige grade.
Gr. 6-leerlinge het niks gekry nie.
Matsamo Primary het geletterdheidboeke vir gr. 1 tot gr. 3 gekry en gesyferdheidboeke vir gr. 4 en gr. 5. Niks vir gr. 6 nie.
In Gauteng het heelparty skole ook nie die regte boeke gekry nie. Die Vumbeni Primary School in Katlehong het Afrikaanse boeke gekry, terwyl die Siphumelele School nog op boeke wag.
Die Baxoxele Primary School in Soshanguve, noord van Pretoria, het geletterdheidboeke vir gr. 1 en gr. 3, gesyferdheid vir gr. 1, gr. 2, gr. 3 en gr. 5 en niks vir gr. 4 en gr. 6 nie. By die Redibone School, ook in Soshanguve, het die meerderheid leerlinge nie boeke gekry nie.
By die A.B. Xuma Primary School in Soweto het net gr. 1 tot gr. 3 boeke gekry.
Die probleme is Donderdag bevestig deur ’n brief wat die onderwysdepartement aan skole gestuur het nadat dit onder sy aandag gekom het te min boeke is by van die skole afgelewer.
Die departement het gesê die werkboeke moet as bykomende ondersteuningsmateriaal gebruik word omdat dit nie veronderstel is om sentraal in die onderwyser se beplanning of onderrig te staan nie.
Die boeke moet ook geensins handboeke of skrifte in die klas vervang nie.
Die departement het by navraag gesê 80% van boeke is afgelewer. Vloede het aflewering in sommige provinsies vertraag en laat registrasie van leerlinge het dit moeilik gemaak om die regte hoeveelhede af te lewer.
Die departement meen alle skole sal einde volgende week hul boeke hê en hulle behoort die oefeninge voor die einde van die tweede termyn te voltooi.