Skole kan besluit oor verspreiding van kondome

2012-10-05 09:45

Johannesburg - Die departement van onderwys het gesê elke skool kan in oorleg met ouers besluit of hy kondome wil versprei, berig Beeld.

Die regering se gesondheidsprogram vir skole sal na verwagting volgende week deur pres. Jacob Zuma bekendgestel word.

Verskeie rolspelers, insluitend die onderwysvakbonde, het oor die program ooreengekom, het Panyaza Lesufi, woordvoerder van die departement van basiese onderwys, gesê.

Uiteenlopende sienings bestaan oor of skole kondome aan leerlinge moet beskikbaar stel in die lig van wetgewing wat seks tussen kinders onder 16 jaar onwettig maak.

Nietemin steun sekere groepe weer die gedagte in die lig van die toename in tienerswangerskappe.

Beheerliggame sal dus ’n beleid hier rondom kan maak.

Lesufi het daarop gewys dat die gesondheidsprogram nie net op seksopvoeding gemik sal wees nie, maar op die algemene gesondheid van leerlinge sal fokus.

– Beeld

– Volg Nuus24 op Twitter

 

- SAPA