Skole ‘bied beskerming vir meisies’
2009-11-20 08:47
Marelize Potgieter
Kaapstad - Daar is ’n afwaartse neiging in tienerswangerskappe in die Wes-Kaap, het die woordvoerder vir die Wes-Kaapse onderwysdepartement (WKOD), Paddy Atwell, gister gesê.
Volgens hom het die WKOD nog nie navorsing oor tienerswangerskappe in 2009 afgehandel nie, maar het dié syfers sedert 2006 beslis gedaal.
Laila Abbas, woordvoerder van die Marie Stopes-aborsie-en-gesinsbeplanningsklinieke, het gesê daar is egter ’n toename in aborsies onder meisies tussen die ouderdom van 12 en 19 jaar in die Wes-Kaap.
“Ons kan nie bevestig dat dié meisies almal skoolgaande is nie, maar kan slegs afleidings maak,” het sy bygevoeg.
Peter Fenton van die WKOD se programbestuur vir MIV/vigs-lewensvaardighede meen die uitdaging vir die onderwysdepartement is om te verhoed dat leerders skole verlaat.
“Skole bied in ’n groot mate beskerming vir leerders en maak meisies minder kwesbaar,” het hy gesê.
Volgens hom is daar talle navorsing wat bewys dat skoolgaande meisies ’n beter kans het om nie swanger te raak nie.
“Dit is kommerwekkend dat 50% van leerders ná die ouderdom van 16 jaar skool verlaat.
“Dit kan maklik tot tienerswangerskappe, werkloosheid, hoërisiko-gedrag en alkohol- en dwelmmisbruik lei, wat aanleiding gee tot ’n afwaartse neiging in die ekonomie,” het hy gesê.
- Die Burger
