Skoksyfers oor MIV en vigs in skole bekend
2010-02-17 08:31
Alet Rademeyer
Pretoria - Sowat 1,8 miljoen skoliere en 51 745 onderwysers het MIV/vigs.
Dié skoksyfers is Dinsdag op ’n werksessie van die Afrikaner Burgerlike Netwerk (ABN) hier bekend gemaak.
Die ABN beplan moontlike toekomsscenario’s vir die land na aanleiding van die Dinokeng-scenario’s wat in Junie gepubliseer is.
Die hoofprobleem is toe uitgewys as ’n kombinasie van ’n ondoeltreffende staat en onbetrokke burgerlike samelewing.
Die ABN verteenwoordig ’n wye verskeidenheid Afrikaanse organisasies.
Chris Klopper, uitvoerende hoof van die Suid-Afrikaanse Onderwysersunie, het met verwysing na gehalte, kundigheid en vaardigheid in die onderwysstelsel, gesê wanneer oor toekomsbeplanning gepraat word, kan die impak van MIV/vigs nie buite rekening gelaat word nie.
Klopper het gesê die jongste statistieke wys sowat 13,9% van die onderwyserskorps het MIV/vigs. Dit verteenwoordig 51 745 uit ’n totaal van 372 000 onderwysers.
Die infeksie onder leerlinge is tussen 1% en 1,5% hoër as onder onderwysers, wat beteken 1,8 miljoen uit die 12 401 217 leerlinge het MIV/vigs, het Klopper gesê.
In die hoëronderwyssektor het 7,10% van personeel aan universiteite MIV/vigs, wat neerkom op 7 714 uit die totaal van 108 687.
Uit universiteite se totale akademiese personeel van 41 383 het 1 968 (4,76%) die sindroom, het hy gesê.
Die infeksiekoers onder studente is ook hoër – 91 892 uit sowat 750 000 het MIV/vigs.
Klopper het gesê die ou tegniese kolleges – deesdae kollegesvir verdere onderwys en opleiding (VOO) – het ’n dramatiese inploffing gehad en is geheel en al disfunksioneel.
Die hele bevolking se deelname aan hoër onderwys is sowat 16%. Vir die onderskeie rasgroepe is dit 12% vir swartes en bruines, 43% vir Indiërs en 54% vir wittes.
In 2008 was daar altesame 90 758 wit Afrikaanssprekende studente uit ’n totaal van sowat 799 490 aan universiteite.
Inskrywingsgetalle van wit studente het van 38% in 1995 tot 32% in 2003 afgeneem, en by gewese technikons van 41% in 1995 tot 14% in 2003.
“Suid-Afrika kom ten opsigte van tegnici voor ’n krisis te staan.”
Klopper het ook gesê verlede jaar was daar 19 189 nagraadse onderwysstudente aan tradisioneel Afrikaanse universiteite.
Van hulle was net 3 274 Afrikaans en 15 915 was Engels.
- Die Burger