Skokkende nuwe Marikana-video uitgesaai
2013-01-28 18:00
Kaapstad – 'n Britse nuuskanaal het skokkende beeldmateriaal uitgesaai wat 'n nuwe perspektief gee op die slagting by Marikana verlede jaar wat tot die dood van 34 mynwerkers gelei het.
Channel 4 News het selfoonvideo's wat na bewering op 16 Augustus 2012 deur twee polisiebeamptes opgeneem is, uitgesaai.
Die enigste beeldmateriaal wat tot dusver aan die media beskikbaar was, was beeldmateriaal wat deur EWN, eNCA en CNN geneem is.
Die video wat deur die polisiebeamptes geneem is, dui egter daarop dat baie van die mynwerkers 'n “paar honderd meter weg” van die media af dood is, het Channel 4 berig.
“Die [mynwerkers] het daarheen gevlug na die aanvanklike skietery, om skuiling te soek,” verduidelik die verslaggewer in die insetsel.
In die polisievideo kan gehoor word hoe iemand uitroep, “Wag, moenie skiet nie! Moenie skiet nie!”. Dit vind plaas ná 'n mynwerker verby die polisie hardloop. Skote klap sekondes later.
Die beampte wat die video neem loop dan na waar 'n man bewegingloos op die grond lê. “Daai motherf****r. Ek het hom ten minste 10 keer geskiet,” sê een van die beamptes in die video.
Die slagoffer word later as 'n 26-jarige mynwerker geïdentifiseer wat 12 keer geskiet is.
'n Verklaring deur die departement van justisie sal volgens Phuti Setati, sekretaris van die Marikana-kommissie van ondersoek, op die regering se kommunikasiewebwerf gepubliseer word.
Die verklaring was teen die tyd wat die berig gepubliseer is, nog nie beskikbaar nie.
Kyk hier na die video (Waarskuwing: Ontstellende beeldmateriaal):
– Lees hier meer.
– Volg Nuus24 op Twitter.
