Skokfoto's gee blik op Marikana-gebeure

2012-11-08 18:00

'n Lugfoto wat deur die polisie geneem is wys hoe twee rye naakte mynwerkers vermoedelik moeti gebruik. (Farlam-kommissie)

Rustenburg – Gewapende mynwerkers van Lonmin was gevaarlik en het niemand in hulle pad gespaar nie, het die Farlam-kommissie Donderdag gehoor.

Lt.kol. Victor Visser het Donderdag vertel van die geweld wat in Augustus hoogty gevier het tydens die staking by Marikana in die Noordwes.

Visser het foto's gewys van 'n toesighouer by die myn wat doodgekap is.

"Hierdie betogers het nie die polisie gespaar nie, en beslis ook nie hulle medewerkers nie. Die lyk van die toesighouer is verskeie kere gekap en 'n [bees se] skedel is op sy bors geplaas.

"Die skedels van verskeie ander diere het in die veld gelê. Dis nie vir ons [om te besluit] of die skedel enige betekenis gehad het nie."

Die kommissie ondersoek die dood van 34 mynwerkers wat op 16 Augustus naby Lonmin se myn by Marikana tydens 'n konfrontasie met die polisie doodgeskiet is. Tien ander mense is ook dood in verwante voorvalle in die week voor die slagting.

Visser het vroeër getuig dat die stakende mynwerkers naak in rye gestaan het om besprinkel te word met moeti, wat hulle onoorwinlik moes maak. Lugfoto's van twee rye kaal mans is aan die kommissie gewys.

– Volg Nuus24 op Twitter.

- SAPA