Skok wag op rykes in Pta en omstreke
2011-04-14 07:20
Pretoria – Al sal veral die welgesteldes in die Metsweding-streek, oos van Pretoria, aansienlik meer eiendomsbelasting moet opdok, gaan baie ander inwoners van die “nuwe Tshwane” voortaan minder vir munisipale dienste betaal, sê die Tshwane-metroraad.
Inwoners van Cullinan, Rayton en Bronkhorstspruit en sekere Pretoriase woonbuurte, waaronder Silver Lakes en Mooikloof, kan ’n eiendomsbelasting-skok verwag.
Die Metsweding-streek, wat die munisipaliteite Nokeng tsa Taemane (Cullinan, Rayton en omstreke) en Kungwini (Bronkhorstspruit en omstreke) insluit, word ná die munisipale verkiesing deel van die “nuwe Tshwane”.
Waar Tshwane, Nokeng en Kungwini tans uiteenlopende heffingstrukture het, sal ’n enkele struktuur van 1 Julie van krag wees.
Volgens ’n berekening van die DA kan inwoners van Nokeng en Kungwini wat ’n residensiële tarief betaal, onderskeidelik 35% en 87% meer eiendomsbelasting betaal.
Dr. Ernie Jacobson, Tshwane se burgemeesterskomiteelid vir finansies, het gesê baie inwoners van Metsweding sal in die algemeen effens meer moet betaal, terwyl sommige minder aan munisipale dienste sal bestee.
Die beginsel van hoe groter die verbruik, hoe groter die munisipale rekening geld steeds weens Tshwane se glyskaal-tariefstelsel, het hy gesê.
Volgens Jacobson gaan Metsweding “geweldige” voordeel uit die samesmelting trek omdat sowat 10% van Tshwane se kapitale begroting in Tshwane se 2011-’12-konsepbegroting vir die streek opsy gesit word.
Jacobson het benadruk dat eiendomsbelasting kragtens die Wet op Munisipale Eiendomsbelasting gehef word.? “Ongelukkig sal meer gegoede inwoners meer moet betaal,” het hy gesê.
Inwoners in rykmanskomplekse soos Silver Lakes, Mooikloof en Pebble Rock kan van 1 Julie ’n veel hoër rekening vir eiendomsbelasting te wagte wees.
Volgens ’n berekening van Tshwane sal iemand wat in Kungwini of Nokeng in ’n huis ter waarde van R1,5?miljoen woon onderskeidelik R429,82 en R483,17 meer eiendomsbelasting opdok.
’n Gesin wat in Kungwini 500 kWh elektrisiteit per maand gebruik, sal ongeveer R67 minder betaal, terwyl daar vir dieselfde gebruik in Nokeng sowat R10 meer gehef sal word.
In Nokeng sal ’n huishouding wat 40 kF water ’n maand gebruik R74,75 meer betaal en ’n gesin in Kungwini R37,71.
Alle geregistreerde hulpbehoewendes kry 100 kWh elektrisiteit, 12 kF water en 6 kF water vir sanitasiedoeleindes gratis.
Andile Dyakala, waarnemende finansiële bestuurder van Tshwane, het gesê die volhoubaarheid van die nuwe Tshwane, wat ná die samesmelting die grootste munisipaliteit in die land gaan wees, moes in ag geneem word.
Volg Nuus24 op Twitter
- Beeld