Skok oor verkragtings by tehuis
2013-02-26 14:15
Kaapstad – Die raad van die St. Michaels-tehuis vir mishandelde tienermeisies in Plumstead, Kaapstad, het gesê hy is diep geskok oor bewerings van seksuele mishandeling by die fasiliteit, berig Eyewitness News.
Die raad wou egter nie kommentaar lewer oor die saak nie, omdat die bewerings nog ondersoek word.
"Weens die sensitiewe aard van die bewerings en minderjariges wat betrokke is, kan ons nie nou kommentaar lewer nie, omdat 'n eksterne ondersoek tans gedoen word," het Bonita Hendicks, van die raad, gesê.
'n Sielkundige en verskeie werknemers het aan die radiostasie gesê die bestuur van die tehuis is bewus dat sommige van die meisies ander molesteer, maar het hulle nie daaraan gesteur nie.
"Dit het in Augustus tydens 'n groepsessie onder ons aandag gekom dat van die meisies saans verkrag word," het Annemie Daly, 'n sielkundige, gesê.
Die departement van maatskaplike ontwikkeling het 'n ondersoek na die bewerings van stapel gestuur.
– Volg Nuus24 op Twitter
