'Skok' oor hantering van N3-ongeluk
2010-03-09 11:34
Durban – Dit was skokkend dat bouwerkers forseer was om aan te hou werk nadat hulle kollega deur ‘n vragmotor doodgery is op die N3-hoofweg in Pietermaritzburg, het Cosatu Dinsdag gesê.
Die Congress of SA Trade Unions (Cosatu) het die voorval, waarin ‘n bouwerker Maandagaand deur ‘n vragmotor doodgery is en nog twee kort daarna ook dood is toe twee vragmotors in die res van die werkers ingery het, as “afgryslik” beskryf.
Verskeie ander mense is in die ongeluk beseer.
Die werkers moes na afloop van die tragedie tyd afgekry het om die skok te verwerk, het Zet Luzipho, Cosatu se sekretaris in KwaZulu-Natal, gesê.
“Die tweede ongeluk kon verhoed word. Hoe kan jy mense forseer om aan te hou werk direk nadat hulle kollega reg voor hulle dood is? Hulle was nog getraumatiseer,” het hy gesê.
Luzipho het gesê dat sy vakverbond geskok is oor hoe die werkers behandel is.
Hy het ook gesê dat hy nie weet hoe die kontrakteurs die werkers se lewens in gevaar kan plaas deur hulle in die aand te laat werk nie.
Die ongeluk het plaasgevind toe die bestuurder van die vragmotor, wat plastiekpype vervoer het, beheer oor die voertuig verloor het en ‘n werker getref het. Die man is op die toneel oorlede.
“Die ongeluk het omstreeks middernag plaasgevind. Een baan is noodgedwonge gesluit. Twee ander vragmotors het kort na dié ongeluk in die res van die groep werkers in die geslote baan vasgery.
“Die visvragmotor het van die pad afgegaan en teen die ander vragmotor, wat staal vervoer het, gebots. Die staalvragmotor het toe teen die vragmotor gebots wat plastiekpype vervoer het.”
Die lyke van die ander twee werkers is aan die kant van die pad gevind.
Twee ander werkers is in ‘n kritieke toestand en nog drie werkers is matig tot ernstig beseer, het Jeff Wicks van Netcare 911 gesê.
- Sapa