Skok-getuienis gelewer in Kotzé-verhoor
2012-11-28 15:15
Johannesburg – Die vrou wat op Ina Bonnette afgekom en haar bevry het, het Woensdag getuig dat sy geskok was oor Bonnette se toestand, berig Eyewitness News.
Johan Kotzé, wat as die Modimolle-monster bekendstaan, het erken dat hy sy eksvrou in Januarie gemartel en vermink het.
Hy word ook daarvan beskuldig dat hy drie mans gehuur het om Bonnette te verkrag en haar 19-jarige seun, Conrad, vermoor het.
Vivian van der Merwe het aan die hof gesê sy het die dag van die voorval na Kotzé se huurhuis gegaan, nadat hy haar man gebel het om te sê hy gaan die dorp verlaat.
Sy het gesê sy was geskok toe sy sien Bonnette is vasgemaak en dat daar bloed op haar bors was.
Van der Merwe het gesê Bonnette het aan haar gesê drie mans het haar verkrag en dat haar seun geskiet is.
Volgens haar was Bonnette erg getraumatiseer en het daarop aangedring dat hulle so gou as moontlik na die polisiekantoor gaan, omdat Kotzé op pad is na haar ouers se huis.
Bonnette het verlede week getuig hoe Kotzé haar gemartel het terwyl hy gesê het hoe lief hy haar het.
Sy het gesê Andries Sithole, Pieta Mohlane en Frans Mphaka het haar beurtelings verkrag.
Die vermeende verkragters het onskuldig gepleit en gesê Kotzé het hulle gedwing om die dade uit te voer.
– Lees meer hier
– Volg Nuus24 op Twitter
