Skoert, Chuene!
2009-09-20 12:14
Pretoria - Dank Leonard Chuene af.
Dit was gisteraand die ondubbelsinnige eis van mnr. Gert Oosthuizen,
adjunk-minister van sport, aan Atletiek Suid-Afrika (ASA).
“Mnr. Chuene het nie net vir ons gelieg nie, maar vir die hele Suid-Afrika. Dit is onaanvaarbaar,” het Oosthuizen in ’n verklaring gesê.
Dit kom enkele ure nadat Chuene tydens ’n perskonferensie by die Nasionale Persklub in Pretoria erken het dat hy gelieg het oor die kwessie van Caster Semenya se geslagstoetse.
“Ons versoek die lede van die ASA om dissiplinêre stappe te doen teen Chuene . . . as hulle dit nie doen nie loop hulle die gevaar om deur ’n leuenaar gelei te word.”
Chuene het gisteraand by navraag aan Rapport gesê: “Ek kan nie reageer op wat ek nie weet nie – dankie, tot siens.”
Die DA, Cope en die ACDP eis almal Chuene se kop.
Chuene het sedert die Semenya-geslagsdebakel wat losgebars het nadat sy die 800m-titel vir vroue by die Wêreldatletiekkampioenskap in Berlyn gewen het, onder meer:
- Rasseverdeling in Suid-Afrika aangeblaas deur die vinger na “wit rassiste” en die Suid-Afrikaanse media te wys;
- Pres. Jacob Zuma en die regering in die verleentheid gestel deur hulle by ’n internasionale skandaal te betrek;
- Die Internasionale Vereniging van Atletiekfederasies (IAAF) teen Suid-Afrika die harnas ingejaag; en
- Semenya emosioneel getraumatiseer.
Die Semenya-drama – en Chuene se gure aandeel daarin – is gister op die spits gedryf toe Chuene gebieg het: “Ek het gelieg om Caster Semenya te beskerm.”
Maar bedank gaan hy nié, het hy in dieselfde asem gesê.
Chuene het die laaste paar weke ontken hy het geweet Semenya is aan geslagstoetse onderwerp.
Gister het hy egter ’n ander deuntjie gesing nadat e-pos eergister aan die lig gekom het wat bewys hy het wel van die geslagstoetse geweet.
Hy het egter eers gebieg nadat hy hom in vraetyd in leuens toegespin het.
Chuene het die Suid-Afrikaanse publiek onvoorwaardelik om verskoning gevra vir sy leuens.
“Hoewel ek van die toetse geweet het, het ek voortgegaan om die bestaan daarvan te ontken.
“Dit is nie uit kwaadwilligheid gedoen nie en my doel was nooit om die Suid-Afrikaanse publiek te mislei nie.
“Ek het gevoel ek tree in Semenya se belang op en het geglo my voortgesette ontkennings sou help om haar te beskerm.”
Chuene het wel gesê hy vra nié verskoning daarvoor dat hy Semenya toegelaat het om te hardloop of omdat hy probeer het om die saak vertroulik te hou nie. Hy het weer die skuld op die IAAF gepak.
“Kritiese vrae moet aan die IAAF gestel word oor hoekom hy nie die korrekte prosedure gevolg het nie en waarom hy sy aksies op ’n enkele mediaberig gegrond het.
Chuene ontken ASA het Semenya geoffer ter wille van ’n medalje. “Hoewel ons enige medalje verwelkom, moet dit nie ten koste van die atlete wees nie.”
- Rapport
Vir meer hieroor, besoek
Rapport