Skietery in Pta-winkelsentrum
2009-10-22 14:26
Johannesburg – ‘n Fidelity-sekuriteitswag is in ‘n kritieke toestand nadat ‘n skietery Donderdag by die Menlyn Retail-winkelsentrum uitgebreek het, het nooddienspersoneel gesê.
“’n Groep gewapende mans het op ‘n juwelierswinkel en ‘n Nedbank in die sentrum toegesak. ‘n Skietery tussen die rowers en die sekuriteit het uitgebreek en een van die wagte is gewond,” het Chris Botha, Netcare 911-woordvoerder, gesê.
Die verdagtes het van die toneel gevlug.
Die sekuriteitswag is na die Pretoria Oos-hospitaal geneem. Hy is steeds in ‘n kritieke toestand. Die polisie kon nie dadelik vir kommentaar bereik word nie.
Hierdie is een van vele rooftogte in winkelsentrums in Gauteng die afgelope tyd. ‘n Bakkery is Sondag in die Dunkeld-sentrum beroof. Die Greenstone Mall in die ooste van Johannesburg is reeds twee keer deur rowers geteiken.
–Sapa