'Skiet die boer': Afriforum Jeug kla student aan
2011-11-17 20:00
Johannesburg – Afriforum Jeug het Donderdag ‘n klag van haatspraak teen ‘n Johannesburgse student aanhangig gemaak vir die sing van ‘n veranderde weergawe van die “skiet die boer”-liedjie.
Die klag is teen ‘n lid van die Universiteit van die Witwatersrand se studenteraad, Tokelo Nhlapo, ingedien nadat glo hy “dubula lekgoa”, wat beteken “skiet die wittes”, gesing het.
Charl Oberholzer, voorsitter van Afriforum Jeug, het gesê dit is op 14 Oktober by die universiteit gesing tydens ‘n toespraak deur die onlangs geskorste leier van die ANC-Jeugliga, Julius Malema.
“Om studente aan te hits om liedjies van haat te sing, is ‘n teken van swak leierskap,” het Oberholzer Donderdag in ‘n verklaring gesê.
“Deur hierdie liedjie te sing, het die studente hul haat vir witmense uitgespreek.”
Hy het gesê die universiteit het ‘n ondersoek van stapel gestuur, maar geen bevindings is nog bekend gemaak nie. Die universiteit kon nie onmiddellik vir kommentaar bereik word nie.
‘n Verhoordatum sal na verwagting deur die Johannesburgse Gelykheidshof vasgestel word, het Oberholzer gesê.
- Volg Nuus24 op Twitter