Skerp toename in korrupsie
2012-11-11 07:47
Kaapstad – Altesaam 90% van senior bestuurders in die Oos-Kaapse gesondheidsdepartement het in die 2010-’11-boekjaar sake met die regering gedoen, het Rapport Sondag berig.
'n Totaal van 567 tenders ter waarde van R894 miljoen is ontvang, het die weekblad gesê.
Die ANC het ook wetgewing waarvoor die Staatsdienskommissie (SDK) vra om korrupsie in die staatsdiens te stuit, verlede jaar in die parlement gedwarsboom.
Rapport berig prof. Richard Levin, direkteur-generaal van die SDK, het in die parlement aangevoer ’n “onhoudbare” situasie heers in die staatsdiens, met party senior bestuurders wat tot ses maatskappye besit wat met die regering sake doen.
Die SDK raam dat finansiële wanbestuur en korrupsie in die staatsdiens in die 2011-’12-boekjaar tot R1 miljard kan beloop – sowat tien keer soveel as in 2008-’09, toe dié syfer R100 miljoen was.
Gwede Mantashe, die ANC se sekretaris-generaal, het by navraag geweier om kommentaar te lewer op die SDK se voorstel vir strenger wetgewing, en het gesê korrupsie in die staatsdiens is een van die kwessies wat by die ANC se nasionale kongres in Mangaung bespreek sal word.
– Lees hier meer.
– Volg Nuus24 op Twitter.
