Skeepswrak bly kopseer vir Kaapse owerhede

2012-09-01 23:01

Kaapstad – Opruimingswerk ná nog 'n olielek uit die wrak van die Seli 1 is Saterdag weens rowwe toestande op see afgelas, het Stad Kaapstad se rampbestuursentrum gesê.

"Die werk moes deur die stad se rampbestuurspanne afgelas word en die spanne sal weer Maandag begin wanneer die toestande verbeter het; die gewone inspeksies sal egter uitgevoer word," het Wilfred Solomons-Johannes, woordvoerder, gesê.

'n Dik laag olie uit die gestrande vistreiler die Seli 1 het op die strand by Table View in Kaapstad uitgespoel.

'n Luginspeksie het getoon dat die Seli 1 nou in drie stukke opgebreek het, het Solomons-Johannes gesê.

"Die beeldmateriaal het ook getoon dat swart olie op die hoogwaterlyn van Dolphin-strand lê, 800 m ver. Dit het ook vir 'n verdere 500 m op die strand oorkant die Rietvlei-vleilandreservaat gelê."

Stad Kaapstad voer samesprekings met die departement van vervoer om 'n permanente oplossing te vind met betrekking tot die wrak van die Seli 1.

– Volg Nuus24 op Twitter.