Skaatser vervolg oor waaghalsige toertjie

2013-02-07 09:37

Kaapstad – 'n Skaatsplankryer van Kaapstad wat teen sowat 70 tot 80 kilometer per uur in Kloofnekweg in Kaapstad afgeblits het, gaan vervolg word, is Donderdag berig.

Die 24-jarige Decio Lourenco van Tamboerskloof het verlede maand in die pad af geskaats toe ’n munisipale spoedkamera ’n foto van hom geneem het. Beamptes het nou gesê hy gaan vervolg word vir roekelose en nalatige gedrag.

JP Smith, burgemeesterskomiteelid vir veiligheid en sekuriteit, het aan die Cape Times gesê Lourenco sal nie die opsie van 'n boete gegee word nie.

"Die saak sal by die polisie geopen word en ons sal die direkteur van openbare vervolging vra om hom te vervolg."

Teen Donderdagoggend het 'n video van die waaghalsige toertjie meer as 207 000 trefslae op YouTube gehad.

Smith het gesê daar is "geen manier" waarop die stad skaats op openbare paaie sal wettig nie.

Ingevolge die verordening word skaats slegs op openbare paaie toegelaat indien die pad spesifiek vir dié doeleinde ontwerp is.

Marco Morgan van die National Skaters Collective het aan die koerant gesê daar is geen geriewe vir skaatsplankryers nie.

"Dit is 'n vinnig groeiende sport. Indien ons 'n ooreenkoms met die stad kan aangaan vir padsluitings op sekere tye, sal ons nie die verkeer ontwrig nie."

Kyk hier na die video:


       
– Volg Nuus24 op Twitter

- SAPA