Skaatser tref lorrie en sterf
2012-03-20 08:00
Kaapstad – ’n Gautengse skaatsplankryer is Maandag dood toe hy op die Franschhoekpas onder ’n aankomende vragmotor ingery het.
Carlito Trancoso (29) van Randburg is op die toneel dood verklaar. Hy en ’n paar vriende was op ’n pretrit.
Trancoso was die naweek in die Kaap om op sy skaatsplank aan die Fair Cape Downhill Challenge deel te neem.
André Visser, woordvoerder van die ER24-ambulansdiens, het gesê Trancoso het ernstige buik-, bors- en kopbeserings opgedoen.
Die voorval het omstreeks 13:50 naby die Carmel-kampeerterrein op die R45 in die Franschhoekpas gebeur.
“Ons paramedici het hom op die grond langs die pad aangetref. Hulle reken hy het sowat 50 km/h gery toe hy die vragmotor getref het. Dit het nie goed gelyk nie.”
Volgens die groep mans wat saam met hom was, het die vragmotor bo-oor Trancoso gery.
Supt. Lizelle Stroebel van die verkeersdepartement op Stellenbosch het gesê Trancoso het in die rigting van Villiersdorp gery en die vragmotor in die rigting van Franschhoek.
“Hy het die aankomende vragmotor getref toe hy om ’n draai gery het.”
Van Trancoso se vriende het aan beamptes van die Franschhoek-polisie gesê hy was nog ’n beginner in dié sportsoort.
Een van hulle het glo voor gery en die groep agter hom gewaarsku dat ’n vragmotor op pad is en dat hulle stadiger moet ry of na ’n ander baan moet oorskuif.
“Hulle het hom seker nie gehoor nie,” het Stroebel gesê.
Trancoso is Maandagaand deur sy oom uitgeken.
Justin Boast, voorsitter van die South African Gravity Racing Association, het gesê hulle reël gereeld afdraande-kompetisies in geslote bane omdat hulle bewus is van die gevare wat met die sport gepaardgaan.
– Volg Nuus24 op Twitter
- Die Burger
