Situasie by skole ‘fyn dopgehou’
2010-08-18 07:45
Die Burger
Johannesburg - Dankie, maar nee dankie.
Staatsdiensvakbonde kan vandag reeds dié boodskap eenparig aan die regering oordra met amptenare wat steeds nie te vinde is vir die jongste “verbeterde” aanbod nie.
Die Suid-Afrikaanse Demokratiese Onderwysersunie (Sadou) begin reeds Woensdag landwyd met ’n onbepaalde staking.
Meer as ’n miljoen staatsamptenare moes die laaste paar dae besluit of hulle die staat se aanbod van ’n 7%-salarisverhoging en ’n verhoogde behuisingstoelae van R700 aanvaar.
Vakbonde eis ’n 8,6%-verhoging – twee keer meer as die huidige inflasiekoers – en ’n huissubsidie van R1 000.
Die regering se hoop dat ’n ooreenkoms vandeesweek bereik kan word, het gister soos mis voor die son begin verdwyn.
Ook Nehawu het aangedui sy lede is steeds nie tevrede met die aanbod nie.
Sadou en Nehawu, die twee grootste vakbonde in die staatsdiens, het saam bykans 500 000 lede.
Albei vakbonde wil “so gou moontlik” begin staak.
Sommige onderwysers het al vroeër die week onwettig begin staak in Gauteng en KwaZulu-Natal en ’n groot chaos by skole veroorsaak.
Mugwena Maluleke, Sadou se hoofsekretaris, het gesê dié vakbond se uitvoerende komitee het gister eenparig besluit om vandag met ’n “volskaalse staking” te begin.
Hy het gesê Sadou-lede het die jongste aanbod “heeltemal” verwerp en toon “oorweldigende” steun vir ’n staking.
Maluleke het gesê Sadou het verder onderneem om met die ander staatsdiensvakbonde in die Cosatu-stal en die Onafhanklike Arbeidskoukus (ILC) saam te werk om ’n omvattende aksieplan in werking te kry.
Manie de Clerq, adjunk-hoofbestuurder van die staatsdiensvakbond PSA, het gesê hulle sal einde vandeesweek of eers Maandag al hul lede se stemme getel hê.
Dumisani Nkwamba, woordvoerder van die minister vir die staatsdiens en administrasie, het gesê die regering is hoopvol dat vakbonde gisteraand “amptelik” sou aandui of hulle die jongste aanbod aanvaar.
Vakbondleiers en die regering se onderhandelaars het Dinsdagaand in Centurion in die staatsdiens se koördinerende bedingingsraad vergader.
Die Wes-Kaapse minister van onderwys, mnr. Donald Grant, het aan Marelize Potgieter gesê die situasie by skole sal fyn dopgehou word.
“Ons moedig alle ouers en voogde aan om kinders skool toe te stuur.”
Luidens ’n verklaring van die Wes-Kaapse tak van Sadou word padversperrings op die N1 en N2 beplan waar lede teen ’n slakkepas in ’n konvooi sal ry.
Volg Nuus24 op Twitter
- Die Burger