Sittings oor e-tol 'noodsaaklik'

2012-11-16 14:27

Johannesburg – Tiyani Rikhotso, woordvoerder vir die departement van vervoer, sê die openbare sittings oor die e-tolstelsel was noodsaaklik.

Hy meen dit was veral belangrik om op sekere kwessies te fokus.

Die SABC berig Rikhotso het op Morning Live gesê dit was belangrik dat die gemeenskap betrokke raak, sodat inligting aan hulle verduidelik kon word.

Eyewitness News het vroeër berig ontstoke motoriste het by die laaste sitting in Sunninghill, noord van Johannesburg, gewaarsku dat hulle die e-tolstelsel se tooerusting aan die brand gaan steek en paaie versper indien die regering met die projek voortgaan.

Dit volg nadat Cosatu gesê het hy gaan aan die einde van die maand ‘n betoging teen die e-tolstelsel hou en die provinsie se hoofweë tot stilstand ruk.

Die Gautengse voorsitter van die vakverbond, Phutas Tseki, sê dié sittings is ‘n klug en gaan geen impak op die implementering van e-tol hê nie.

Hy het intussen ‘n beroep op die publiek gedoen om op 30 November aan die optog deel te neem.

Volg Nuus24 op Twitter