Sisulu wil soldate 'amputeer'
2009-09-03 06:38
Lizel Steenkamp
Kaapstad - Die soldate wat onwettig voor die Uniegebou gestaak het, moet nes “ ’n voet met gangreen” van die weermag “geamputeer word”.
’n Onverbiddelike dr. Lindiwe Sisulu, minister van verdediging en militêre veterane, het gister gesê dit is ’n “pynlike besluit en ’n pynlike operasie” wat uitgevoer móét word om die weermag te red.
“Hulle was sonder toestemming afwesig van die werk, hulle het onwettig gestaak, ’n hofbevel verontagsaam én was gewelddadig. Hoeveel meer redes is nodig om iemand te ontslaan?”
’n Afvaardiging van die Suid-Afrikaanse Raad van Kerke het gistermiddag in Kaapstad met die minister vergader in die hoop om die situasie te beredder.
Sisulu het egter agterna op ’n nuuskonferensie by die parlement gesê pres. Jacob Zuma en die kabinet steun die besluit om die “ongedissiplineerde” soldate te ontslaan. “Daar is geen moontlikheid om dit te heroorweeg nie.”
Kennisgewings van voorlopige ontslag is reeds op 1 300 soldate beteken. Hulle moet binne tien dae voorleggings doen oor waar hulle verlede Woensdag was en sal salarisse ontvang totdat die dissiplinêre proses afgehandel is.
Vakbonde het vroeër vandeesweek gedreig om landwyd te staak en die ontslag in die hooggeregshof te beveg. Maar volgens Sisulu se regsadviseur sal die howe die weermag gelyk gee.
Ook oudregter Willem Heath, adviseur van die minister van justisie – mnr. Jeff Radebe – het op die konferensie gesê die land se arbeidswette geld nie vir soldate, polisiebeamptes en verpleegsters nie.
Sisulu het gesê sy is daarteen gekant dat soldate aan vakbonde behoort.
“Ek weet van geen ander land ter wêreld waar dit toegelaat word nie. Soldate se eerste prioriteit is om die Grondwet te gehoorsaam. Om ’n soldaat te wees is ’n roeping.”
Sy het ontken dat daar ná verlede Woensdag se skermutseling ’n vertrouensbreuk tussen die weermag en die polisie is en het vrese dat woedende soldate ’n groter bedreiging sal inhou nadat hulle ontslaan is, afgemaak.
“Die vraag is: is ons veiliger met hulle in die weermag waar hulle toegang het tot al die staat se wapens, of daar buite waar hulle die wapens nie in die hande kan kry nie?”
- Die Burger