Sisulu trek glo neus op vir kantore
2012-07-28 23:02
Johannesburg – Lindiwe Sisulu, minister van openbare dienste en administrasie, weier om 'n voet in haar departement se hoofkwartiere in Pretoria te sit, het die Sunday Times berig.
Die koerant het berig dat Sisulu meen die gebou is in 'n swak deel van die stad, en is nie veilig vir haar personeel nie.
Sy het intussen getrek na die kantore van een van die agentskappe onder haar departement, wat die senior bestuur gedwing het om na 'n ander vloer te skuif sodat die minister en haar personeel genoeg kantoorruimte kan hê.
Ndivhuwo Mabaya, Sisulu se woordvoerder, het bevestig dat die minister nog nie by die departement se hoofkwartiere was sedert haar herontplooiing twee maande gelede nie, as gevolg van vrese oor die toestand en ligging van die gebou.
Mabaya het gesê Batho Pele House, in die Pretoria-middestad, is nie geskik vir Sisulu en ander personeel van die minister nie.
Hy het gesê die gebou is verwaarloos en in 'n verkeerde deel van die stad, wat dit onveilig maak om laat te werk.
"Dis nie 'n geheim dat die gebou nie in 'n goeie ligging is nie. Ek persoonlik sal 'n probleem hê om in die aand daar te werk," het hy gesê.
Sisulu werk vanuit die kantore van die staatsinligtingstegnologie-agentskap (Sita) in Erasmuskloof in Pretoria-Oos.
Mabaya het egter gesê Sisulu het niks te doen gehad met die besluit om die kantore te skuif nie. Hy het gesê die besluit is deur 'n ministeriële bestuurspan geneem.
– Volg Nuus24 op Twitter.
- SAPA
