Sisulu sê DA-LP is 'met vlooie besmet'

2012-11-14 13:37

Johannesburg – Lindiwe Sisulu, minister van staatsdiens en administrasie, het aan die DA-LP David Maynier gesê hy en sy “vlooie-besmette liggaam” moet gaan sit, nadat hy haar daarvan beskuldig het dat sy openbare hulpbronne gemors het.

Business Day berig die parlementslid het in die Nasionale Vergadering genoem dat Sisulu tydens haar ampstermyn as minister van verdediging, luukse stralers gebruik het.

“Ek kan my net indink dat die voormalige minister van verdediging en militêre veterane, Lindiwe Sisulu, na die ultra-luukse... straler verlang...” het hy gesê.

Nosiviwe Mapisa-Nqakula, huidige minister van verdediging, het in ‘n antwoord op ‘n parlementêre vraag bevestig dat Sisulu meer as 200 kere tussen Pretoria en Kaapstad in die straler gereis het.

Mapisa-Nqakula het ook bevestig dat dit elke keer R200 000 gekos het.

Die koerant berig Sisulu het gesê Maynier se bewering is “nonsens” en dat hy en sy “vlooie-besmette liggaam” moet gaan sit.

Volg Nuus24 op Twitter

- SAPA