Simelane-uitspraak het 15 foute, sê Zuma
2011-12-23 08:40
Kaapstad – Die vyf appèlregters wat bevind het dat adv. Menzi Simelane uit sy pos as nasionale vervolgingshoof verwyder moet word, het 15 regs- en feitefoute in hul uitspraak gemaak.
Só voer pres. Jacob Zuma aan in hofstukke wat Donderdag by hoofregter Mogoeng Mogoeng in die konstitusionele hof ingedien is.
In dié hofstukke vra Zuma dat die konstitusionele hof moet weier om die appèlhof se bevel te bekragtig.
Ingevolge die Grondwet moet die konstitusionele hof die appèlhof se bevel bekragtig of afkeur voordat dit van krag word, omdat dit ’n handeling van die staatshoof was.
Van die 15 foute wat in die appèlhof gemaak is, sê Zuma, is onder meer dat Zuma se besluit oor Simelane ’n objektiewe oordeel van Zuma geverg het. Zuma sê sy subjektiewe beoordeling was voldoende.
Hy sê ook die appèlhof was verkeerd om te beslis dat die Ginwala-kommissie van ondersoek se kritiek teen Simelane “sy integriteit regstreeks in die gedrang gebring het”.
Die appèlregters se bevinding dat hy (Zuma) homself nie tevrede gestel het nie dat Simelane se aanstelling sal meebring dat die hele vervolgingsgesag daarvan verdink kan word dat die NVG nie sy werk “sonder vrees, begunstiging of vooroordeel” doen nie, is ook foutief, sê Zuma.
Maar Zuma hou tog die agterdeur oop vir ingeval die konstitusionele hof die appèlhof se bevel bekragtig. In só ’n geval moet die hof beslis dat die ongeldigheid van Simelane se aanstelling nie terugwerkend van krag is nie, omdat dit “’n magdom besluite van Simelane sedert sy aanstelling in die gedrang bring”.
– Volg Nuus24 op Twitter
- Die Burger