Simelane kon homself nie verdedig, sê Radebe
2009-12-01 06:42
Sarel van der Walt
Pretoria - Adv. Menzi Simelane, die nuwe direkteur van openbare vervolgings (NDOV), het nooit die geleentheid gehad om homself voor die Staatsdienskommissie (SDK) te verdedig nie.
Daarom het hy op regsadvies besluit om nié tugstappe teen Simelane te doen nie. Daar was ook geen betroubare getuienis van enige wangedrag deur Simelane wat só ’n verhoor geregverdig het nie, het Jeff Radebe, minister van justisie en konstitusionele ontwikkeling, gistermiddag op ’n nuuskonferensie hier gesê.
’n Storm het verlede week om Simelane se kop losgebars nadat pres. Jacob Zuma hom op verrassende wyse as die land se vervolgingsbaas aangestel het.
Simelane was die direkteur-generaal van justisie wat ’n brief aan adv. Vusi Pikoli geskryf het om nie die vorige polisiehoof, mnr. Jackie Selebi, te vervolg nie.
Pikoli, toe hoof van die vervolgingsgesag, het geweier en is later deur oudpres. Thabo Mbeki geskors. Dit het tot die Ginwala-kommissie gelei, voor wie Simelane getuig het. Dr. Frene Ginwala, voorsitter, het sy getuienis beskryf as teenstrydig, onakkuraat, vals, sonder enige gronde en ver van die waarheid verwyder.
Oudpres. Kgalema Motlanthe het die SDK-ondersoek daarna aangevra omdat “daar vrae oor Simelane se eerlikheid” was.
Radebe het gesê terwyl hy die SDK se verslag bestudeer het, het hy besef die SDK het nooit aan Simelane die geleentheid gebied om te reageer op die aantygings wat die Ginwala-kommissie teen hom gemaak het nie. Radebe het gesê hy het Simelane se reaksie oor Ginwala se aantygings aan die SDK voorgelê met ’n versoek dat dié reaksie oorweeg en Simelane se mondelinge getuienis aangehoor word. Die SDK het nie aan dié versoek gehoor gegee nie.
- Die Burger