Sigaretstompie kelder plaasmoordenaar
2011-06-20 20:53
Pretoria – Spoeg op ‘n sigaretstompie wat gevind is op die toneel waar ‘n vrou vermoor is op ‘n melkplaas by Cullinan drie jaar gelede, het verseker dat haar moordenaar skuldig bevind is.
Tumelo Shakes Monakedi (27) van Refilwe is Maandag in die Hooggeregshof in Pretoria skuldig bevind op aanklag daarvan dat hy Connie Janneke (61) op die Du Plooy-melkplaas naby Cullinan vermoor het.
Janneke se lyk is op 21 Januarie 2008 op haar bed gevind nadat sy nie vir werk opgedaag het nie.
Haar hande en voete was agter haar rug vasgebind en ‘n handoek was styf om haar nek gebind.
Slegs haar selfoon was weg.
‘n Venster is gebreek om toegang tot ‘n kothuis langs die hoofhuis op die plot in Kaalfontein te kry.
Janneke is laas lewendig gesien toe sy die vorige aand op die stoep oor haar selfoon gepraat het.
Sy het slegs vier dae vroeër uit Kempton Park na die plaas getrek.
Monakedi is met die misdaad verbind deur DNS wat in spoeg op ‘n sigaretstompie, wat binne die kothuis gevind is, was.
‘n Kenner het getuig dat slegs een in 23 miljard mense se DNS by dié op die sigaretstompie sal pas.
- Volg Nuus24 op Twitter
- SAPA