'Siek polisielede kos staat meer as R771 m'
2011-10-12 13:15
Kaapstad – Polisielede wat verlede jaar afwesig was by die werk weens siekte, het die belastingbetaler meer as R771 miljoen gekos, het die Vryheidsfront Plus (VF+) in ‘n verklaring gesê.
Volgens die verklaring wat Woensdag uitgereik is, is dit ‘n toename van 40% teenoor 2009. ‘n Totaal van 1,5 miljoen werksdae het hierdeur verlore gegaan.
Dít is volgens die jaarverslag van die polisie in die tydperk vanaf 1 Januarie 2010 tot 31 Desember 2010.
“Wat werklik kommerwekkend is, is die 40% toename van siek lede en dat hoogs geskoolde en geskoolde lede die meeste siek is,” meen Pieter Groenewald, hoofwoordvoerder vir die polisie van die VF+.
“Hierdie kategorie van lede vorm die kern van die polisiediens wat misdaad moet ondersoek. Die syfers toon dat daar ‘n ernstige probleem is wat aandui dat polisielede in hierdie kategorieë of oorwerk is of onder te veel druk en spanning geplaas word...”
Volgens Groenewald neem hierdie probleem jaarliks toe en volgens die jaarverslag het 138 839 lede verlede jaar siekverlof of permanente of tydelike onbevoegdheidsverlof geneem.
“Dit is meer as 50% van die totale polisiemag.”
Groenewald sê genl. Bheki Cele, nasionale polisiekommissaris, “moet sê wat hy gaan doen om die probleem op te los.”
Volg Nuus24 op Twitter
- Nuus24