Shrien Dewani wéér nie in hof

2012-10-12 15:16

Kaapstad – Die uitleweringsaak van Shrien Dewani het in ‘n hof in Londen, Engeland, voortgeduur.

eCNA het berigte dat die moordbeskuldigde nie in die hof teenwoordig sal wees nie, pas bevestig.

Dewani het vroeër vandeesmaand ook nie tydens sy uitleweringsaak in die hof verskyn nie, maar mediese kenners van die staat en die moordbeskuldigde het hul weergawes van sy geestegesondheid in die hof gestel.

Die verdagte se gesondheid is die hoof struikelblok wat sy uitlewering na Suid-Afrika verhoed.

Die SABC het vroeër berig ‘n volledige verhoor sou vandag gehou word.

Dewani word daarvan aangekla dat hy die moord op sy vrou, Anni, gereël het. Sy is in November 2010 tydens hul wittebrood in Kaapstad in ‘n beweerde motorkaping doodgeskiet.

Zola Tongo en Mziwamadoda Qwabe dien reeds tronkstraf uit vir hul aandeel in die moord.

Sapa het vroeër berig Qwabe het in sy pleitooreenkoms erken dat hy mev. Dewani saam met sy medebeskuldigdes – Xolile Mngeni, Tonga en mnr. Dewani – ontvoer het. Mngeni word steeds verhoor.

Qwabe het gesê mnr. Dewani het die moord gereël. 

Volg Nuus24 op Twitter