Shilowa vol vertroue oor Cope-leierskap
2010-12-14 09:00
Die Burger
Kaapstad - Ondanks ’n tugverhoor wat oor sy kop hang is Mbhazima Shilowa, onderleier van Cope, vol vertroue oor sy kanse om die leierskap van dié beleërde party vandeesweek oor te neem.
Sy woordvoerder, Sipho Ngwema, het by navraag gesê Shilowa sien uit na die kongres en is “vol selfvertroue” oor die naderende kongres.
Hy en sy teenstander, Mosiuoa Lekota, partyleier, kom môre teen mekaar te staan wanneer die leierskongres van sowat 2200 afgevaardigdes in Pretoria ’n nuwe partyleierskap sal kies.
Philip Dexter, partywoordvoerder, het egter gister gesê dit gaan nie “oor dié of daardie individu nie. Wat belangrik is, is dat dit ’n demokratiese proses is.”
Erge tweespalt heers tans tussen Lekota en Shilowa. Sake is só erg dat ’n senior partylid aan die nasionale werkkomitee (NWK) voorgestel het dat dit in twee afsonderlike dele voortbestaan.
Shilowa se selfversekerdheid kom ondanks ’n bevinding deur Sarah Christie, die onafhanklike voorsitter van sy tugkomitee, dat die tugproses wat die party teen hom begin het, mag voortgaan.
Tugstappe is teen Shilowa geneem nadat ’n forensiese ondersoek na die party se geldsake op verskeie onreëlmatighede gewys het met die gebruik van Cope se parlementêre toelaag.
Shilowa se verhoor het verlede week in die parlement begin, maar is uitgestel omdat hy aangevoer het die besluit om tugstappe teen hom in werking te stel, is nie gemagtig onder Cope se huidige grondwet nie en dat dit dus ongeldig verklaar moet word.
Christie het egter bevind die tugverhoor is wetlik saamgestel en dat die kwessies binne die tug-tribunaal se jurisdiksie val.
Dexter het in ’n verklaring hieroor gesê die nuutste terugslag vir Shilowa is geen verrassing nie. Hy hardloop weg van sy verantwoordelikheid, terwyl hy “alle wetlik saamgestelde ondersoekprosesse vertraag. Die onderleier is op rekord dat hy sy naam wil skoon kry, maar het alles probeer om ’n forensiese ouditproses te vermy.”
Volg Nuus24 op Twitter
- Die Burger