Shilowa skop vas ondanks uitspraak
2010-06-08 07:36
Die Burger
Kaapstad – Mbhazima Shilowa weier om die strydbyl te begrawe en sê hy is steeds die waarnemende leier van Cope.
Die Suid-Gautengse hooggeregshof in Johannesburg het egter eergister beslis Mosiuoa Lekota, Shilowa se teenstander, is die leier van die party.
Volgens regter Rammaka Mathopo se uitspraak is Shilowa verlede naweek by die Cope-konferensie in Centurion ongrondwetlik as waarnemende president aangewys.
Mathopo het in sy uitspraak gesê die haas waarmee Lekota uit sy pos onthef is, is ’n teken van hoe daar op politieke vlak gekonkel is.
Shilowa beoog om teen Mathopo se uitspraak te appelleer en hy het Lekota en sy regspan reeds daaroor ingelig.
Shilowa glo hy is tot en met die afhandeling van die appèlsaak steeds die waarnemende leier van Cope.
Phillip Dexter, Lekota se woordvoerder, glo Shilowa kan nie sê hy is die leier van die party nie, want die hofuitspraak is steeds geldig.
“Dit is skrikwekkend watter minagting dié man (Shilowa) vir ons howe wys. Shilowa dink die reg is net van toepassing op ander mense maar nie op hom nie.”
Volgens Shilowa is dit nodig om die “verkeerde” hofuitspraak reg te stel.
“Ek gaan nie met enigiemand baklei oor of dit my of jou hoekkantoor (corner office) is nie. Dit is nie my geaardheid nie.”
Shilowa het ook belowe hy sal Lekota nie fisiek uit Cope se hoofkantoor in Braamfontein skop nie.
Hy erken egter die toekoms van die party sal nie in die howe besluit word nie, maar op politieke vlak.
Shilowa meen die appèlsaak is nodig.
Lekota het eergister ná die hofuitspraak gesê Cope sal nie weer “sulke kullery soos onlangs ” in sy geledere duld nie.
Mluleki George, senior Cope-LP en Shilowa-ondersteuner, het gister erken “dit is somtyds moeilik om almal se ego’s te akkommodeer”.
Volg Nuus24 opTwitter
- Die Burger