Shilowa misluk in nuwe poging om Cope te kaap
2010-06-10 08:30
Die Burger
Kaapstad. – Mnr. Mbhazima Shilowa se planne om Cope te kaap lê aan skerwe nadat die Suid-Gautengse hooggeregshof in Johannesburg gister wéér gelas het mnr. Mosiuoa Le- kota is die enigste regmatige partyleier.
Regter Rami Mathopo het sy verklarende bevel, wat Sondag gemaak is, gister bekragtig en die Shilowa-groep se aansoek om verlof tot appèl met koste geweier.
Dit beteken Lekota sal Copepresident bly tot ten minste September, wanneer ’n beplande leiersverkiesing gehou word.
Die party het die hof se beslissing gister uit twee monde aanvaar: eers het Shilowa se bondgenoot, mnr. Onkgopotse J.J. Tabane, gesê Cope aanvaar die regter se oordeel, waarna mnr. Phillip Dexter, bondgenoot van Lekota, gesê het: “Demokrasie het geseëvier”.
Lekota het volgens Sapa gesê hy is verlig duidelikheid is verkry en dat Cope-lede aan die werk moet spring om takke te vestig en vir die leiersverkiesing voor te berei.
Hy was ook reeds in gesprek met me. Charlotte Lobe, die party se hoofsekretaris en ’n vurige Lekota-ondersteuner, oor die skedulering van ’n vergadering van die nasionale komitee om oor die pad vorentoe te besin.
Gister se hofbeslissing is die jongste in ’n reeks nederlae vir die Shilowa-groep, wat oënskynlik vasbeslote is om die party oor te neem, en volg op ’n rits regsaksies sedert verlede naweek se kongres in Irene, buite Pretoria. Die besluite wat op dié kongres geneem is, is ook deur die hof tersyde gestel.
Intussen lyk dit of Shilowa hom kan vetsmeer vir tugoptrede binne die party weens die haglike toestande van Cope se parlementêre geldsake, waarvan hy die rekenpligtige beampte is.
Die parlement gaan glo nagenoeg R5 miljoen, wat kwartaalliks aan politieke partye vir kiesafdeling- en koukuswerk uitbetaal word, terughou omdat Cope se finansiële state nie geoudit is nie.
Volg Nuus24 op Twitter
- Die Burger