Shiceka skuldig aan wanadministrasie
2011-10-14 10:49
Kaapstad – Adv. Thuli Madonsela, Openbare Beskermer (OB), het Sicelo Shiceka, minister van plaaslike regering en tradisionele sake, skuldig bevind aan wanadministrasie en die misbruik van openbare fondse en het die president gevra om "ernstige aksie" teen hom te oorweeg.
Sy het gesê Shiceka het die destydse waarnemende president, Kgalema Motlanthe, doelbewus mislei oor 'n reis na Switserland omdat hy twee keer sy meisie in die tronk besoek het.
Madonsela het gesê Shiceka het vir haar gejok deur te ontken dat hy die gevangenis in Berne besoek het en sodoende die etiese gedragskode vir lede van die uitvoerende gesag verontagsaam het.
Sy het gevra dat die direkteur-generaal in die presidensie haar binne 60 dae in kennis stel van die aksie wat teen Shiceka geneem is.
Madonsela het in September 'n voorlopige verslag aan pres. Jacob Zuma oorhandig en 'n beroep op hom gedoen om stappe teen Shiceka te doen nadat daar bevind is dat hy meer as R1 miljoen spandeer het op persoonlike reise en hotelle.
Shiceka is sedert Februarie met siekteverlof.
Die OB het haar finale verslag aan die parlement se portefeuljekomitee oor justisie en grondwetlike ontwikkeling oorhandig.
– Lees meer hier
– Volg Nuus24 op Twitter
- SAPA