Shiceka sal betaal, beloof Zuma
2011-04-28 13:59
Johannesburg - Stappe sal teen Sicelo Shiceka, minister van samewerkende regering en tradisionele sake, geneem word as dit aan die lig kom dat hy wel belastinggeld en staatshulpbronne misbruik het, het pres. Jacob Zuma Donderdag gesê.
"Daardie saak word baie aktief hanteer... en sodra ons 'n slotsom bereik sal ons aksie neem," het Zuma aan verslaggewers by Luthuli-huis in Johannesburg gesê.
Shiceka, wat sedert Februarie op siekverlof is, het na bewering belastinggeld gebriuk vir vlugte en verblyf by luukse hotelle. Hy het na bewering ook staatshulpbronne gebruik om sy huis in die Oos-Kaap te bou.
Die Sunday Times het vroeër berig dat munisipale vragmotors gebruik is om water te vervoer na die bouperseel by Ingquza, terwyl water nie aan die gemeenskap self voorsien kon word nie.
Daar word verder beweer dat 'n geteerde straat van R32 miljoen verby Shiceka se huis aangelê is, terwyl lede van die gemeenskap met grondpaaie tevrede moet wees.
- Volg Nuus24 op Twitter.