Shiceka in die sop, wys uitgelekte verslag
2011-09-29 07:03
Pretoria – Nog ’n minister kan voor stok gekry word wanneer die openbare beskermer (OB) volgende maand ’n verslag oor die beweerde verkwisting van belastingbetalersgeld bekend maak.
Die OB se voorlopige verslag oor die aantygings van wanbesteding teen Sicelo Shiceka, minister van samewerkende regering en tradisionele sake, het vandeesweek aan die media uitgelek.
Adv. Thuli Madonsela, die OB, stel volgens Business Day in die verslag voor dat pres. Jacob Zuma ernstige stappe oorweeg teen Shiceka, wat sedert Februarie op onbepaalde siekteverlof is.
Die parlement se staande komitee vir etiek en ledebelange het die OB versoek om bewerings te ondersoek dat Shiceka meer as R350 000 bestee het om ’n vriendin in ’n Switserse tronk te besoek en R640 000 aan luukse hotelverblyf in Kaapstad. Hy het na bewering ook duisende rande aan vliegkaartjies vir familielede bestee.
Dit sal die tweede keer vanjaar wees dat Madonsela in ’n verslag voorstel dat Zuma stappe teen ’n minister oorweeg. Me. Gwen Mahlangu-Nkabinde, minister van openbare werke, is in twee OB-verslae veroordeel vir haar rol in die omstrede huurooreenkomste vir polisiehoofkantore.
Die OB het glo bevind Shiceka het R546 864 op sy nie-amptelike besoek aan Switserland verkwis.
Madonsela het haar teleurstelling uitgespreek oor Business Day se besluit om die uitgelekte verslag te publiseer.
Sy het gesê dit is onwettig om inligting in voorlopige verslae te publiseer en die OB oorweeg regstappe.
– Volg Nuus24 op Twitter
- Beeld
