Shabangu versigtig vir 'konflikdiamante'

2012-06-05 13:55

Johannesburg – Die minister van minerale hulpbronne, Susan Shabangu, het gewaarsku dat die hersiening van die definisie van “konflikdiamante” versigtig hanteer moet word, het ‘n berig Dinsdag gelui.

Shabangu het Maandag by die Kimberley-proses-sertifiseringskema (KPCS) se vergadering in Washington gepraat, het Zimbabwe se Herald Online berig.

Die voorsitter, Gillian Milovanovic, wat van die VSA is, het voorgestel dat die definisie van konflikdiamante betrekking moet hê op stene wat ontgin is in gebiede waar “enige diamant-verwante geweld” heers.

Shabangu het gesê as die kwessie nie versigtig hanteer word nie, kan die KPCS skeur, en dit kan ernstige gevolge inhou vir die “miljoene mense wat staat maak op inkomste van diamante.”

Milovanovic sê die breër definisie is nodig om die geloofwaardigheid van die KPCS te verseker.

– Volg Nuus24 op Twitter

 

- SAPA